11  deputetët e Kuvendit të Kosovës shumë shpejt do të dalin para Gjykatës Themelore në Prishtinë. Aktakuza ndaj tyre është dorëzuar në gjykatë dhe lëndët i janë ndarë  tashmë gjyqtarëve.

Gjykimi i deputetëve të  Vetëvendosjes, Rexhep Selimi, Glauk Konjufca, Besa Baftija, Shqipe Pantina, Glauk Konjufca, Aida Dërguti, Teuta Haxhiu,  kryetari i Prizrenit, Mytaher Haskuka, deputetët e AAK-së, tashmë ministri i Infrastrukturës, Pal Lekaj dhe deputetja e AAK-së, Time Kadrijaj, si dhe deputeti i Nisma për Kosovë, Enver Hoti, pritet të nis këtyre muajve.

Zëdhënësja e Gjykatës Themelore në Prishtinë, Mirlinda Gashi i ka thënë Arbresh.info se lëndët e 11 deputetëve janë ndarë në  7 raste dhe te disa gjyqtarë të ndryshëm.

“Lidhur me kërkesën tuaj ju njoftojmë se në Gjykatën Themelore në Prishtinë  janë shtatë raste sa i përket të akuzuarve në fjalë të cilat janë në procedim te gjyqtarë të ndryshëm”, thotë Gashi.

Nuk janë vetëm pesë  deputetët e Lëvizjes Vetëvendosje, Albin Kurti, Donika Kadaj Bujupi, Faton Topalli,  dhe Albulena Haxhiu  që po  përballen në gjykatë për gjuajtjen e gazit lotsjellës brenda sallës së Kuvendit të Kosovës dhe për pengim të personit zyrtar në kryerjen e detyrës.

Kësaj liste nuk i kanë shpëtuar as ish-deputetët, të cilët tash kanë poste ministrore, apo edhe kryetar komune.

Zëdhënësja e kësaj gjykate në një prononcim më herët për Arbresh.info“ pati thënë se 11 deputetët dhe ish-deputetët kanë procedurë penale në Gjykatën Themelore në Prishtinë për veprat penale nga neni  375 par.1 dhe nga neni 409 par.1  të Kodit Penal të Republikës së Kosovës.

Ndryshe, deputetët e Lëvizjes Vetëvendosje, Albin Kurti, Donika Kadaj-Bujupi, Albulena Haxhiu dhe Faton Topalli, më 3 janar të këtij viti janë dënuar për hedhjen e gazit lotsjellës në Kuvendin e Kosovës nga Gjykata Themelore e Prishtinës.

Për përdorim të armës, deputeti, tashmë i pari i VV-së, Albin Kurti ka marrë dënim unik prej  1 vjet e 6 muaj burg, deputetja Albulena Haxhiu me 1 vjet e 3 muaj, Donika Kadaj-Bujupi me 1 vjet e 6 muaj, si dhe deputeti Faton Topalli  me dënimi unik prej 1 vit e dy muaj.

Që të gjithë këta  janë dënuar me kusht  që të jenë në verifikim gjatë periudhës  dy vjeçare.

Në dhjetor të vitit 2015, deputetët e opozitës në atë kohë, Vetëvendosje, AAK dhe Nisma, duke kundërshtuar marrëveshjet për Asociacionin e Komunave me Shumicë serbe dhe Demarkacionin e Kufirit me Malin e zi, kanë hedhur gazë lotsjellës brenda sallës së kuvendit, duke pamundësuar kështu disa herë radhazi mbajtjen e seancës së rregullt të Kuvendit të Kosovës./Arbresh.info/ Gita Lushi